आभूषण बजार
नेपाल सुनचाँदी व्यवसायी महासंघका केन्द्रिय सदस्य भरत अग्रवालले गरिमामय संगठन नेपाल सुनचाँदी व्यवसायी महासंघको एकतामा आँच आउन नहुनेमा सवैले हेक्का राख्नुपर्ने बताउनुभएको छ ।
आभूषण बजार पत्रिकासँगको कुराकानीमा गोलबजार उद्योग वाणिज्य संघका अध्यक्ष समेत रहनुभएका अग्रवालले महासंघ भित्र सवै वर्ग समुदायका सुनचाँदी व्यापारी भन्ने पहिचानमा बाधिएकाले कोही कसैले पनि जातियताको गन्ध दिने ढंगबाट काम गर्न नहुने बताउनुभएको छ । सुनचाँदी पेशा यस भित्र रहेका सवै वर्ग समुदायको भएकाले सवैको सम्मान हुने,कसैलाई पनि छुट्टाउने ढंगबाट क्रियाकलाप गरिन नहुने अग्रवालको भनाई छ ।
विश्वकर्मा सुनचाँदी व्यवसायी संजालको विहिवार रौतहटको चपुरमा भएको कार्यक्रममा जाति समुदायलाई तोकेर गाली गलौज र आरोप प्रत्यारोप गर्ने फोरम बनेको भन्दैं अग्रवालले यस प्रति आफ्नो चासो र चिन्ता भएको बताउनुभयो । कार्यक्रममा सहभागी उमेश वरालले मारवाडी समुदायकै नाम तोकेर जातियता विग्रह गराउने उत्तेजक भाषण र किन मारवाडीलाई सहयोग गर्ने भन्नेबाट मासलाई भड्काउने कार्य भएको भन्दै यस्तो हुनु गलत र आपत्तीजनक भएको अग्रवालले बताउनुभयो । अग्रवालले कम्पनी खडा गर्नु राम्रो भएता पनि सुनचाँदी व्यवसायी विचमा भएको सद्भाव विगार्ने ढंगबाट संजालको फोरम उपयोग हुनुले संजालको दुरुपयोग र उद्देश्य विमुख भएको होकी भन्नेमा चिन्ता लागेको बताउनुभयो ।
सद्भाव विगार्ने ढंगबाट विश्वकर्मा या कुनै पनि समुदाय विशेषको शब्दलाई दुरुपयोग गर्दा महासंघको एकतामा कमि आउने भएकाले संजालले संगठन विस्तार भन्दा पनि कम्पनीको खाँका अनुसार काम गरेको भए राम्रो हुने अग्रवालको सुझाव छ ।
प्रतिक्रिया दिनुहोस्