आभूषण बजार
ललितपुर सुनचाँदी व्यवसायी संघले २५ औं वर्षगाँठ पुरा गरेको अवसरमा रजत जयन्ती भव्यताका साथ मनाएको छ । रजतवर्ष समापन समारोह सँगैको तेस्रो अधिवेशनले रमेशबहादुर शाक्यको अध्यक्षतामा ११ सदस्यीय कार्यसमिति गठन गरेको छ । सर्वसम्मतीबाट अध्यक्षमा चयन हुनुभएका रमेशबहादुर शाक्यको जन्म वि.स.२०२० जेठ १५ गते माता मनमायाँ शाक्य र पिता दानबहादुर शाक्यको कोखबाट ंमंगलबजार ललितपुरमा भएको हो ।
ललितपुर सुनचाँदीमा लामो समयसम्म काम गर्नुभएका सरल र इमान्दार व्यक्तिको रुपमा रमेशबहादुर शाक्यलाई लिइने गरीन्छ । सुनचाँदी व्यवसायीहरुसँग मिजासिलोरुपमा प्रस्तुत हुन सक्ने क्षमताका शाक्यको नेतृत्वमा ललितपुर सुनचाँदीको विकासमा महत्वपूर्ण टेवा पुग्ने विश्वास गरिएको छ । शाक्यले हाल हःखामा श्री वसन्धुरा स्वर्ण आभूषण नामक व्यवसायिक फर्मबाट आफ्नो पेशालाई निरन्तरता दिइरहनुभएको छ ।
प्रस्तुत छ सर्वसम्मत अध्यक्ष बन्नुभएका शाक्यसँग आभूषण बजार पत्रिकाले भावि योजनाका विषयमा गरेको कुराकानीको सारसंक्षेप ।
तपाई ललितपुरका व्यवसायीहरुले अध्यक्षमा विश्वास गरेका छन् किन माँया गर्नुभयो जस्तो लाग्छ ?
सवै भन्दा पहिला मलाई ललितपुर सुनचाँदी व्यवसायी संघको अध्यक्ष जस्तो गरिमामय पदमा सर्वसम्मत चयन गर्नुभएकोमा सवै पदाधिकारीहरु र आम व्यवसायीहरुमा मुरी मुरी धन्यवाद दिन चाहान्छु । मलाई अध्यक्षमा विश्वास गर्नुको कारण संघमा मैले लामो समयदेखि विभिन्न पदमा रहेर निरन्तररुपमा सेवाको भावानाले काम गर्नुनै हो जस्तो लाग्छ । मैले २०५६ सालदेखिनै निरन्तर संघको सेवा गर्दै आइरहेको छु । संघलाई निरन्तर अगाडि बढउनको लागि मलाई दुईपटक अध्यक्षको लागि प्रस्ताव हुँदा पनि मैले जिम्मेवारी नलिएको हुँ । तेस्रो पटक मलाई साथीहरुले अव चाँही जिम्मेवारी लिनुपर्छ भनेपछि मैले पनि आफ्नो इच्छा व्यक्त गर्दै स्विकार गरेर अघि बढेको हुँ ।
ललितपुरका व्यवसायीहरुको हकहितको लागि अव तपाईको काम के–के हुन्छन ?
संस्था भनेको सवैको सहयोग र योगदानबाट अघि बढ्ने हो । ललितपुरका व्यवसायीहरुको के चाहाना छ म उहाँहरुकै इच्छा र सुझाव अनुसार काम गर्दछु । व्यवसायीहरुनै संस्थाको मेरुदण्डको उनीहरुलाई खुशी पारेर अघि बढ्नु मेरो काम हुनेछ । अर्को कुरा संस्थालाई आर्थिक तथा बौद्धिक क्षेत्रमा कसरी अगाडि बढाउन सकिन्छ त्यसमा पनि मेरो ध्यान जानेछ । पछिल्लो समयमा नेपाल सुनचाँदी व्यवसायी महासंघमा आवद्ध विभिन्न जिल्ला संघहरुले आफ्नै भवन समेत बनाएका छन् । ललितपुर सुनचाँदीको आफ्नै जग्गा र भवन होस् भन्ने मेरो भित्री चाहाना छ । संघको आफ्नै भवन बनाउनको लागि कसरी अघि बढ्नुपर्छ म कम्मर कसेर लाग्नेछु ।
ललितपुरका सुनचाँदी व्यवसायीहरुले भोग्दै आइरहेको समस्यालाई कसरी हेर्नुभएको छ ?
ललितपुरका सुनचाँदी व्यवसायीहरुले पनि आम सुनचाँदी व्यवसायीले भोग्दै आइरहेको जस्तो साझा समस्यानै भोग्दै आइरहेका छन् । विगतका दिनहरुमा पनि यस क्षेत्रमा सुनपसल लुटपाटमा व्यक्ति हत्या गर्ने सम्मका काम भए । विगतका घटनाको डरबाट अझै पनि हामी उम्कन सकेका छैनौ । अर्को कुरा आम व्यवसायीले भोग्दै आइरहेको समस्या भनेको सुनको आपूर्तिको समस्यानै हो । ललितपुर हाम्रो संघमा २ सयको हाराहारी पसलहरु रहेका छन् । सिजनको बेलामा सुनको अभाव हुने गर्दछ । कहिले हप्तामा ३ केजी त कहिले दुईहप्तामा पनि ३ केजी नपाउने अवस्था रहेको छ । हामीले समान ढंगबाटनै सुन वितरण गरिरहेका र्छौ । सुनको आपूर्तिलाई हल गर्न सकेको खण्डमा व्यवसायमा सहज हुने हामीले आशा गरेका र्छौ ।
प्रतिक्रिया दिनुहोस्