आभूषण बजार
हेटौडा । मकवानपुर सुनचाँदी व्यवसायी संघको दोस्रो अधिवेशन तथा घोषणासभा शनिवार हेटौडामा सम्पन्न भएको छ ।
नेपाल सुनचाँदी व्यवसायी महासंघका वरिष्ठ उपाध्यक्ष माणिकरत्न शाक्यको प्रमुख आतिथ्यतामा भएको कार्यक्रममा वक्ताहरुले सुनचाँदी व्यवसाय क्षेत्रको विकासको लागि युवाहरुले अभिभारा बोक्नुपर्नेमा जोड दिएका थिए । कार्यक्रममा बोल्नुहुँदै प्रमुख अतिथि माणिकरत्न शाक्यले युवाहरुलाई सुनचाँदी व्यवसायको क्षेत्रमा प्रोत्साहन गर्नुपर्ने बताउनुभएको छ । सुनचाँदी क्षेत्रलाई समयसापेक्ष विकास गर्दै युवाहरुलाई यस क्षेत्रमा प्रोत्साहन गर्न सकिएको खण्डमा नेपालमै विदेश भन्दा बढी आर्थिक आम्दानी गर्न सकिने बताउनुभयो । मकवानपुरका सुनचाँदी व्यवसायीहरु २०५३ सालदेखिनै जागरुक व्यवसायीहरु भएकाले यहाँका व्यवसायीहरुले व्यवसायिक हकहितसवालमा सक्रियरुपमा काम गरेको शाक्यले बताउनुभयो । सुनचाँदी क्षेत्रको नियम कानुनको सवालमा समेत महासंघको तर्फबाट आफुहरुले व्यवसायिक हकहितको क्षेत्रमा राम्रो कामको सुरुवात गरेको समेत शाक्यले बताउनुभयो । उहाँले पछिल्लो समयमा व्यवसायीहरुले डिजिटल प्रविधिबाट काम गरेको भन्दैं उपभोक्ताबाट विश्वास जितेको बताउनुभयो ।
कार्यक्रममा बोल्नुहुँदै महासंघका पूर्व अध्यक्ष मणिरत्न शाक्यले २० वर्ष अघि साढे ५ लाखको हाराहारीमा राजश्व बुझाउने प्रणाली सुरु गरेको महासंघले हाल आएर १२ अर्वसम्म राजश्व बुझाउने अवस्थासम्म आएको बताउनुभयो । नेपालमा अझै पनि व्यवसायीमैत्री वातावरण नभएको भन्दैं सुनको आपूर्तिमा राज्यले अझै पनि व्यवसायीहरुलाई समस्यामा पार्ने गरेको बताउनुभयो ।
महासंघका उपाध्यक्ष एंवम प्रदेश नम्बर २ का संयोजक दियेशरत्न शाक्यले बाग्मती प्रदेशको राजधानी हेटौडा भएकाले महासंघले आफ्नो प्रादेशीक कार्यालय छिट्टै हेटौडामा खोल्ने तयारी गरेको बताउनुभयो । राज्यलाई कर तिर्दा पनि सुनचाँदी व्यवसायलाई संकुचन बनाइएको शाक्यले बताउनुभयो ।
सोही अवसरमा बोल्नुहुँदै राष्ट्रिय उपभोक्ता मञ्चका अध्यक्ष प्रेमलाल महर्जनले कानुनको विषयमा जानकार नभए व्यवसायीहरुलाई फसाइने हुनाले व्यवसायीहरु सचेत भएर कारोवार गर्नुपर्ने बताउनुभयो ।
नेपाल सुनचाँदी व्यवसायी महासंघका सचिव किरणभाई बज्राचार्यले सुनचाँदी क्षेत्रमा अझै पनि शान्ति सुरक्षाको अभाव रहेकाले पर्याप्त सुरक्षाको प्रवन्ध गर्न राज्यसमक्ष माग गर्नुभयो ।
काठमाडौं सुनचाँदी व्यवसायी संघका अध्यक्ष महेन्द्ररत्न शाक्यले सुनचाँदी व्यवसायमा कालो अध्यारो छाएकाले यसलाई हटाउन युवाहरु सक्रियताका साथ लाग्नुपर्ने समय आएको बताउनुभयो ।
कार्यक्रमका सभापति संघका अध्यक्ष ज्योतिरत्न बज्राचार्यले २०५३ सालदेखिनै मकवानपुरका व्यवसायीहरु जागरुक भएर व्यवसायिक हकहितका क्षेत्रमा काम गर्दै आइरहेको बताउनुभयो । उहाँले सुनचाँदी क्षेत्रमा चुनौतिको चाङ धेरै रहेकाले यसलाई चिरेर व्यवसायिक जगत अघि बढ्नुपर्ने बताउनुभयो ।
अधिवेशनले केशव रसाईलीको अध्यक्षतामा १७ सदस्यीय नयाँ कार्यसमिति चयन गरेको छ । सर्वसम्मतीबाट चयन पदाधिकारीहरुलाई संघका संस्थापक अध्यक्ष एंवम निर्वाचन समितिका संयोजक पूर्ण शाक्यले सपथ गराउनुभयो । नवनिर्वाचित अध्यक्ष केशब रसाईली व्यवसायीहरुको साथ र आपसी सहमतीमा व्यवसायिक हितको पक्षमा काम गर्ने बताउनुभयो ।
प्रतिक्रिया दिनुहोस्