आभूषण बजार
काठमाडौं । पछिल्लो समय सुनचाँदी पसल चोरी हुने घटनामा वृद्धि भएको छ । काठमाडौंका मुटुमा दुईवटा भयानक चोरीका घटना भएका छन् भने मोफसलमा समेत पसललै रित्ताउने गरी चोरीका घटना भएको छ ।
माघ २१ गते राती ३ बजेको समयमा पुल्चोकबाट मंगलबजार जाने बाटो पर्ने ललितपुरको श्रीबहालस्थित शाक्य ज्यासःपसःमा चोरी भयो । सेफनै उठाएर चोरी हुँदा समेत छेउछाउकाले समेत सुइको पाएन भने सुरक्षानिकाय जिल्लै परेको छ । ११५ तोला सुन र २५० तोला सो पसलबाट चोरी भएको थियो । ललितपुर सुनचाँदी व्यवसायी संघको विशेष सक्रियतामा दबाब दिदा सिसिटीभी फुटेजको आधारमा तीनजनालाई ललितपुर प्रहरीले पक्राउ गर्न सफल भएता यस घटनाले सुनचाँदी पसलको चोरी र जोखिमतामा भने ठुलै त्रास पैदा गरेको छ । शाक्य ज्यासःपसःको चोरीको घटना सेलाउन नपाउँदै यस्तै प्रकृतिको घटना लाजिम्पाटको पवी ज्वेलर्समा पनि भएको छ । १०० मिटर दुरीको प्रहरीको विटको आँखा अगाडिबाटै सटर फोडेर चोरहरुले करोडौको गहना र नगद चोरेर लगेका छन् । सो पसलले जानकारी दिए अनुसार १ करोड २५ लाख बराबरको सुनचाँदीको गहना र २ लाख २५ हजार नगद चोरी भएको छ । चोरी गरेपछि सिसिटिभीको हार्डडिक्स समेत लुटेराले लगेपछि चोरलाई प्रक्राउ गर्ने प्रहरीको अनुसन्धानले सुराक पाउन सकिरहेको छैन । सुरक्षाअंगको आँखा अगाडिनै चोरी हुन थालेपछि शंका गर्ने उब्जिएको व्यवसायीहरुले बताएका छन् ।
यसैगरी फागुन १८ गते नवलपुर जिल्ला गैडाकोट स्थित उमेश गहतराजको मोनिका सुनचाँदी पसलमा पनि कराडौंको सुनचाँदीको गहनाहरु चोरी भएका छन् । पसलनै रित्ताउने गरी भएको चोरीका कारण यतिबेला संचालक उमेश गहतराज चोर पक्राउ गरिनुपर्ने भन्दैं चौकी धाइरहेका छन् । फिल्मीशैलीमा भएको चोरीको कुनै पनि सुराग प्रहरीले पत्ता लाउन सकेको छैन । गहतराजले चोरी खोलुवाको सुचना समेत सार्वजनिक गरेका छन् । पछिल्लो घटनाक्रम हेर्दा निकै होशियार र व्यवसायिक चोरहरुले विशेष योजना बनाएर सुनचाँदी पसलहरुमा लुटपाट मच्चाइरहेका छन् । कम्जोर सुरक्षाको छिद्रतालाई मध्यनजर गर्दै व्यवसायिक चोरहरुले मौका मिले जुनकुनै पसललाई पनि लुटपाट गर्न सफल नहोला भन्न सकिदैन । लाजिम्पाटकै व्यस्त सडक त्यसमा पनि प्रहरी विटकै अगाडि पबि ज्वेलर्समा चोरी हुन सक्छ भने छेउकुनाका सुनचाँदी पसल चोर्नको लागि व्यवसायिक लुटेराहरुलाई कुनै आइतवारनै नहोला भन्न सकिदैन । तसर्थ पछिल्लो समयमा भइरहेको श्रृंखलाबद्ध चोरीका घटनाका विषयबाट पाठ सिकेर सरोकारवाला निकायहरु प्रहरी प्रशासनसँग साझेदारी गरेर आगामी दिनमा यस्ता घटना नदोहोरिन नदिन के गर्न सकिन्छ ठोस रणनीति बनाएर अघि बढ्नुको विकल्प छैन ।
प्रतिक्रिया दिनुहोस्