आभूषण बजार
काठमाडौं,वैशाख । केही व्यवसायीक सुनचाँदी महासंघका पदाधिकारीहरुले कालोबजारीबाट लाभ लिन सुन सिफारिस आफुलाई पार्न लाखौंको कमिसनको चलखेल गरेको आंशकाको सुईको पाएपछि आन्तरिक राजश्व विभागले सुन वितरण गर्ने माताहतका वितरक र फर्मको पूर्ण विवरण झिकाउन पत्राचार गरेको छ ।
आन्तरिक राजश्व विभागले सुनको वितरण प्रक्रिया,वितरणको शैली,आयआर्जनको अवस्था बुझ्न नेपाल सुनचाँदी व्यवसायी महासंघको मातहतको सुनको वितरक,थोक विक्रेताको नाम,स्थायी लेखा नम्बर र जिम्मेवार पदाधिकारीको नाम समेत माग गरेको छ । राजश्व विभागले महासंघकै पदाधिकारीले अनुचित फाइदा लिईएको हुन सक्ने भन्दैं महासंघकै पदाधिकारीको पद सहितको नाम समेत खुलाएर पठाउन अनुरोध गरेको छ । राजश्व विभागले यसरी नाम,पद र प्यान नम्बरनै पठाउन अनुरोध गरेपछि नेपाल सुनचाँदी व्यवसायी महासंघको पदाधिकारीको शनिवार बसेको बैठकमा भुईचालो गएको छ । शनिवारको वैठकमा सुनको पारदर्शी वितरणमा महासंघको अध्यक्षको कार्यशैलीमा साना व्यवसायीका पक्षधर उपाध्यक्ष शिवकुमार सर्राफले खोट लगाएपछि शिवकुमार सर्राफलाई कारवाही गरी पदबाट वर्खास्त गर्नुपर्ने भन्दैं केही जिम्मेवार पदाधिकारीले आवाज उठाएको समेत जानकारीमा आएको छ । आन्तरिक राजश्व विभागबाट सम्पूर्ण विवरण उपलब्ध गराउन ताकेता आएपछि संचारमाध्यमको समेत ध्यानाकर्षण भएको छ । केही संचारमाध्यमले यस विषयलाई अव निरन्तर फलो गरेर कालोबजारी गर्ने पदाधिकारीको अनुसन्धान गरी कारवाही नहुँदासम्म कलम चलाउने बताइरहेका छन् ।
यसैवीच आन्तरिक राजश्व विभागले ४ वटै महासंघलाई अनुसन्धानको लागि पत्र पठाएको हो या नेपाल सुनचाँदी व्यवसायी महासंघलाई मात्र हो यस विषयमा भने अझै जानकारी आउन बाँकी रहेको छ । यदि एउटा महासंघलाई मात्र पत्राचार गरेको हो भने महासंघ भित्रकै केही ठूला ठेकेदारको चलखेलमा साना व्यवसायीलाई किलो सुन उठाउन नसकोस् र फेरी पनि कालोबजारी गर्न पाइयोस भन्ने हेतुले आएको हुन सक्ने केही जिम्मेवार पदाधिकारीले बताएका छन् । नयाँ कार्यसमिति बनेदेखि १८८ केजी भन्दा बढी सुन सिफारिस हुँदा चलखेल र अन्यायपूर्ण ढंगबाट सुन वितरणको सिफारिस भएको भन्ने समेतका कुराहरु बाहिर आएका छन् यस विषयमा समेत आभूषण पत्रिकाले सत्यतथ्य बाहिर ल्याएर राजश्व विभागलाई ध्यानाकर्षण गराउनेछ ।
यसैवीच आन्तरिक राजश्व विभागले अनुसन्धानको लागिपत्र पठाएसँगै साना व्यवसायीहरु स्वागत र खुशीयोग्य कदम भएको बताएका छन् । सुनको कालोबजारी विरुद्ध लड्न आभूषण मिडियाले खबरदारी अभियान चलाएसँगै साना व्यवसायीहरुले आफ्नो भविष्य जोगाउन मोर्चावन्दी र एकता गर्नुपर्ने आवाज उठाएका छन् । सुनको कालोबजारी विरुद्ध आभूषण मिडियाको खबरदारी अभियानबाट साना तथा मझौला व्यवसायी उत्साहित र खुशी भएको भन्दैं यो अभियानलाई निरन्तरता दिने मिडियाका निर्देशक रेशम लाम्गादेले बताउनुभयो ।
सुनचाँदी व्यवसायीहरुले अभिभावक सोचेको पवित्र संस्थालाई आड बनाएर केही तप्काले निरन्तर व्यक्तिगत स्वार्थ पूर्ति गर्ने,कालोबजारी नरोकी साना व्यवसायीहरुलाई धारासाय बनाउने कदम नरोकिएपछि महासंघको नेतृत्व र जिम्मेवार पदाधिकारीप्रति व्यवसायीले आक्रोश र वितृष्णा पोख्न थालेका छन् । नेपालका विभिन्न जिल्लामा अझै पनि तोलामा ४ हजार देखि ४ हजार पाँच सयमा बढी लिएर साना व्यवसायीहरु विस्थापित गराउने तरिकाबाट कालोबजारी चलिरहेको छ । कालोबजारी हटाउन जिम्मेवार पदाधिकारीले कुनै पनि कार्यक्रम लिएर हिड्नको सट्टा तै चुप मै चुपको अवस्थामा रहेका छन् । अव विभागको पत्र आएसँगै भूईचालो आएको छ यसमा साना व्यवसायीहरुले कालोबजारीलाई कारवाही गर्न निर्णायक भूमिका खेल्ने अपेक्षा गरिएको छ ।
प्रतिक्रिया दिनुहोस्